已淡出幕前嘅戴志偉，最近因為捲入伸脷風波，再次人氣急升成為新聞人物。事緣林漪娸日前接受訪問時，點名控訴37年前同戴志偉喺劇集《他來自江湖》飾演情侶，喺拍接吻戲時，遭對方強行伸脷濕吻，呢一吻更帶走漪娸嘅螢幕初吻，對於「加料伸脷」呢個指控，戴志偉呢日出席一個高爾夫球活動時，都話要為自己洗白。
戴志偉解釋呢場接吻戲係十秒：「咁我哋嘴唇接觸係兩秒，兩秒已cut shot，一cut shot 大家就離開，我真係百思不得其解，我希望大家睇清楚。」戴志偉話喺TVB做咗咁多年，絕對清白，所以佢覺得好冤枉，仲話要保留追究權利，戴志偉續稱太太絕對相信佢，佢話當年自己全力拼搏，根本唔得閒諗呢啲嘢。至於會唔會揾漪娸姐問清楚？戴志偉表示：「我諗應該佢揾我，佢要解釋囉。」
本來呢日係一個大好機會，兩人可以當面對質，事關漪娸姐每年都會出席呢個活動，但呢日佢竟然臨時缺席，咁大家唯有睇番昔日嘅劇集片段，等大家自行判斷啦。
曾經同漪娸姐合作過嘅任達華，謙謙君子形象深入民心，曾經同華哥合作過劇集《荊途》嘅漪娸姐都大讚華哥係正人君子，而華哥話同漪娸姐當年合作愉快，仲大讚漪娸姐當年係一個好爽朗同單純嘅女仔，令人好易喺戲中愛上佢。
