楊思琦近年熱愛直播及拍片分享生活點滴，育有一仔一女嘅佢對小朋友都非常愛錫。思琦近日喺社交平台分享6歲細仔Kody疑似因病入院嘅片段，令人關注嘅係一直身份成謎、從未現身喺公眾眼前嘅Kody爸爸繼續隱身，令網民好心疼Kody，病咗都冇爸爸陪伴。
從思琦分享嘅影片可見，二人疑似身處兒童醫院，而神情顯露疲倦虛弱嘅Kody就瞓喺病床上，更向陪伴在側嘅媽媽撒嬌，伸手嗲媽媽。而思琦不時掂阿仔嘅手，亦會摸一摸阿仔嘅頭，盡顯溫柔母愛，佢更配文表示：「愛你，你好勇敢啊！」
而網民讚思琦係一位好媽媽，但有人問思琦嘅「虛擬老公」究竟去咗邊？雖然唔少人懷疑Kody爸爸並唔存在，但思琦亦開腔親自解釋過，因為另一半係圈外人，所以先希望可以低調生活。而佢同老公財政獨立，亦各有空間，目前對方長居內地。不過Kody人仔細細，宜家病咗，相信佢會好希望爸爸可以陪伴在側。
