胡鴻鈞（Hubert）與吳若希（Jinny）將於7月強勢登陸廣州，合體舉行《Double Shot雙響2026巡迴演唱會》演唱會，日前兩人抽空親赴當地，展開為期全日「馬拉松式」瘋狂宣傳行程。
兩人深入鬧市與街坊零距離互動，更突襲街頭Busking，吸引大批市民及粉絲包圍十分墟冚！ 當日Hubert與Jinny現身廣州街頭派發宣傳單張及與市民玩遊戲，佢哋一亮相瞬間被熱情街坊及粉絲包圍，大家紛紛拎出手機瘋狂拍照，更有唔少市民即場大合唱，氣氛熱烈。
Hubert笑稱呢次體驗簡直係「受寵若驚」，佢同Jinny去廣州跑全日宣傳：「其實就唔辛苦嘅，雖然佢好嘈，哈…..，但係我覺得好充實！真係好耐冇試過跑足一日宣傳，好開心見返好多老朋友。去到街頭嘅時候，其實真係冇諗過有咁多市民圍觀，嗰下一刻真係有啲驚喜同受寵若驚！起碼見到大家都好熱烈歡迎我同Jinny，大家又識唱我哋啲歌，令到我哋對嚟緊嘅Show多咗好大信心同期待！」
除咗鬧市互動，Hubert與Jinny仲突襲街頭Busking。Jinny甚少參與街頭表演，呢次初體驗絕對係新鮮感十足，Jinny坦言：「好耐未試過全日跑宣傳，感覺好似去敘舊多啲。至於喺街頭Busking，我不嬲都冇玩開，初頭真心覺得好驚！原來同觀眾咁近距離，嗰種感覺好Close，真係好似同屋企人去咗唱K咁！雖然只係唱咗一小段，但見到大家反應超好，希望未來可以多啲同大家咁樣見面。」
Hubert對上一次Busking已經係疫情宣傳嗰陣，今次再同Jinny一齊唱，有種好陌生又好熟悉嘅感覺。Hubert真係覺得好開心。呢次係二人近年首度喺廣州合體開騷，演唱會VIP門票喺開售初期已全數秒殺，主辦單位經過多方協調後，於宣傳當日宣布加推最後少量VIP門票。
Jinny得知好多歌迷買唔到飛，所以佢哋好努力同主辦爭取，雖然Show後要同大家影相派福利，可能會辛苦啲，但Jinny覺得見到大家就非常高興，Hubert表示：「非常之多謝所有歌迷支持！主辦因應群眾反應加推，希望當晚可以同更多人一齊玩、一齊盡興，過一個好開心嘅晚上！」