又到每個星期嘅《電影泉攻略》，主持王鎮泉帶你緊貼最新電影資訊。
Marvel迷都應該記得幾年前傳出《神奇4俠》有意由「小丑女」Margot Robbie演出「隱形女」一角，不過最後揀咗Vanessa Kirby飾演。但近日有傳MCU對新版《X-Man》嘅白皇后一角有心水人選，除咗睇中Margot，Sydney Sweeney亦係心水人選。
最近DC電影《超女》票房成績雖然未如理想，但備受DC重用嘅女編劇Ana Nogueira除咗呢套大作，仲會負責新版《神奇女俠》以及《少年戰隊》嘅劇本創作。Ana早前接受訪問時表示，可以得到DC高層委以重任，真係一份巨大信任，但都係壓力。所以而家希望盡全力可以好好喜歡呢兩部作品，寫出好劇本。
新片速遞：
《迷你兵團與大怪獸》：今集講述迷你兵團如何征服荷里活，一躍成為電影明星，然後一夕間又失去一切，更意外將怪獸釋放肆虐世界！佢哋聯手拯救自己捅出嚟嘅彌天大禍，過程荒誕不羈，貫徹迷你兵嘅搞笑作風。
《UFO離奇命案》：25年前，小學生豪仔喺東頭山離奇失蹤，從此再冇人見過佢。「東頭山小童失蹤案」正式成為神秘嘅都市傳說……25年後，網紅情侶為吸引流量，重回事發現場，結果整蠱行動竟然搞出真命案？！神秘勒索人同外星人連環出現，情況愈演愈失控，一切竟然同25年前嘅失蹤案互相呼應？
《愛你致死不渝》：全球票房突破2.3億美元嘅驚慄懸疑電影。講述性格內向嘅大熊一直暗戀摯友妮琪，但始終唔敢開口表白。一次偶然，佢得到一支號稱能夠實現任何願望嘅神秘「一願柳枝」。喺強烈嘅渴望驅使下，佢偷偷許下心願，祈求妮琪會死心塌地愛上自己。 而夢想嘅愛情瞬間成真，呢個先係佢恐怖人生嘅開端。
票房龍虎榜，截至7月1號中午，第一位《反斗奇兵5》、第二位《給阿嬤的情書》、第三位《超女》。
