「宅男女神」區明妙（MiuMiu）久違兩年，終於宣布推出第二本個人相集。呢次MiuMiu遠赴日本沖繩取景，更親自操刀參與設計，可謂誠意十足！
原本MiuMiu答應粉絲要一年出一本寫真集，但上年喺籌備過程遇到重重障礙，最終未能如期面世。講返起呢件事，MiuMiu都話當時自己比任何人都緊張同焦急，亦好開心今年喺唔同單位邀請下，得到專業團隊做強力後盾：「今次每件事都有開會商量點樣做，比上次有鋪排、有 backup！而且每樣嘢都有加入自己嘅 idea 同元素。」
除咗靚相，呢次MiuMiu嘅新書就藏有佢第一次嘗試親筆設計、手繪及撰寫嘅小手帳：「出寫真集一直係我嘅夢想。今年出到真係好開心，希望以後可以每年都出，當作大家陪伴我成長同青春嘅紀錄。」
今次寫真集特別挑選喺MiuMiu最愛嘅沖繩進行拍攝，第一次踏足沖繩，MiuMiu喺拍攝中途發生咗預料之外嘅小插曲：「我哋本來想像中嘅沖繩係藍天白雲、陽光與海灘，點知六月遇上暴風雨！幸好最後都順利解決，進度良好。出到嚟嘅作品大家都好滿意，克服咗呢個小難關，反而更加有挑戰性同成功感！」
MiuMiu透露寫真書名《明》係由佢所取名，結合咗佢名字中嘅「明」字，英文書名《Bright》並參考日文單字「Akarui」（明亮、開朗）嘅意思：「『明』亦都代表住『閃閃發光』。我希望自己 25 歲嘅人生同未來都可以閃閃發光，同時將呢個寓意帶畀觀眾。希望大家睇完之後，心靈可以被治癒，感受到唔同嘅溫暖。」
