「明星足球隊」成員黃日華、關禮傑、劉洋、李金凱、羅家英等呢日齊集維園，參與一場2026回歸盃足球賽，隊長黃日華雖然未有落場，但係佢啲隊員一樣士氣高昂、奮勇作戰。華哥就話好開心呢幾年有新血加入足球隊，希望金凱同劉洋呢兩位新成員可以快啲融入大家，一齊食嘢唱歌。關禮傑就話，比賽勝負唔係最重要，最重要係大家可以同一家人一樣融洽。
講到兩位新血嘅表現，關禮傑就大讚劉洋動作靈活，加上身形健碩，對手想見縫插針都難殺入去。劉洋笑指自己做後防只需要瞓喺龍門度，對手就完完全全踢唔入。金凱就話自己最鍾意守龍門，不過華哥就話要金凱做龍門嘅話好浪費，因為金凱靈活性好強好快，可以自己帶波衝入去。
作為明星足球隊中堅份子嘅譚詠麟，因為要籌備九月嘅演唱會而要暫時離隊，華哥都話會全力支持校長。不過校長啲飛一票難求，華哥話自己都可能會冇飛，皆因校長採取公平方式分配門票，有幾多分配幾多，華哥都好贊成呢個做法。
