TVB劇集《非份之罪》播出首個單元「無臉女屍」，劇情引人入勝且充滿話題，今晚將揭曉嘉嵐死亡真相！噚晚劇情講述YY（朱敏瀚飾）連日努力調查，向嘉儀（游嘉欣飾）透露康力（吳啟華飾）極有可能殺死Emma（戴祖儀飾）真兇，喺嘉儀為真相感到震撼時，康力向嘉儀打「迷暈針」，令吳啟華「Big Boss」揣測，更加甚囂塵上。
myTV SUPER《非份之罪》
不少觀眾睇得相當肉緊，戴祖儀喺社交平台貼出《非份之罪》開工相：「Emma依幾日都攰啦！最近出街經常要解答大家對劇集嘅疑惑，但又唔可以劇透。」原來大家都好想知Emma下落，戴祖儀有親自喺網上解答網民對Emma呢個角色嘅疑問。
網民問Emma喺邊個時段「覺醒」，離家出走嗰陣會唔會驚，戴祖儀解釋由細到大Emma都係比較有自己嘅諗法，「可能因為係家姐，亦都可能因為『反叛』，更願意為自己爭取自己覺得正確嘅選擇。所以與其話覺醒，不如話係終於勇敢為自己踏出『家』依個囚籠。離開呢一個由細到大嘅舒適區，一定係會驚。但佢係一個好勇敢好有諗法嘅女仔，為佢覺得正確嘅選擇而只不顧一切。如果成功，佢會係自己嘅英雄；如果失敗，我諗佢都唔會為自己嘅選擇而後悔。至少佢有努力爭取過」。
另有網民問佢俾吳啟華摑嗰幕有冇NG咗好多次，戴祖儀回覆：「冇呀，啟華哥勁專業🔥」唔少網民讚吳啟華無論演樂天慈父或專制嚴父均好有感染力。吳啟華喺劇中疑似走火入魔邊緣，將游游五花大綁，擸鐵鎚怒揼朱仔，喺呢個最危急關頭，母親以身相擋為「逃脫CP」YY同嘉儀爭取關鍵逃跑時間，而吳啟華今晚仲有連場爆喊內心戲。
連日朱仔同游游呢對甜爆「逃脫CP」成為網民焦點，佢哋喺社交平台大曬「甜蜜」並寫道：「大家唔好有非分之想我哋只係想食零食。」片中見游游餵朱仔食零食，將零食放喺朱仔嘴唇游游原本想食朱仔唇邊嘅零食，令整個畫面充滿粉紅泡泡，點知朱仔發揮直男本色，同游游搶零食，完美示範秘速激嬲「女友」，難怪游游留言：「獨食一定要肥😡🔥」
《非份之罪》由6月29日起，逢星期一至五晚八點半翡翠台播映