朱茵 Athena Chu 日前受邀到訪一所小學，並接一班由學生化身嘅「小記者」訪問，期間仲同大家分享咗佢嘅演藝心得、經歷以及同家人相處關係。面對一眾小記者嘅提問，朱茵大讚佢哋思路清晰，相當精靈，仲話呢次行程令佢勾返起以前去睇愛女黃鶯演出嘅記憶：「當小學家長好幸福，可以參與到阿囡校園生活，中學就已經冇咁多機會進入校園了。」
朱茵透露愛女黃鶯已進入反叛青春期，所以同對方嘅相處方式亦有所改變，而家就要成為對方嘅朋友，唔可以擺阿媽款，要聆聽對方嘅內心世界、信任佢。朱茵指佢同老公黃貫中都唔係怪獸家長，雖然有時會想法不一，但大家都係為個女好，同時亦會盡可能畀空間同自由囡囡自己做決定，而佢哋就會引導對方選擇正確道路，教佢辨別是非，因為佢認為父母永遠都係小朋友嘅最大後盾，會支持佢每個決定，無論是錯是對，都會全家面對，呢個亦係佢哋一家努力學習同實踐嘅信念。
