蔡卓妍（阿Sa）同曾樂彤向來感情要好，最近佢哋就一齊現身中環大館，去到香港著名電影美術指導張蚊同導演陳詠燊策劃嘅電影展覽「拍住上—光影裡並肩馳騁的我們」打卡！佢哋兩個一入到會場就戲精上身，喺多個神還原嘅經典港產片場景前瘋狂拍照，玩得不亦樂乎。
阿Sa與曾樂彤喺五大亮點展區中逐一探索，當去到致敬《縱橫四海》嘅「天翻地覆」展區時，見到倒掛嘅吊燈與顛倒嘅古堡設計，阿Sa即按耐不住躁動嘅戲癮，模仿發哥周潤發同哥哥張國榮懸垂半空偷畫嘅英姿；而去到「生生不息」嘅黃金展品前，阿Sa仲化身「金絲雀」瞓身碌過啲金磚，相當搞笑！
之後去到全場最震撼嘅「破而後立」展區時，佢哋唔只喺電單車上扮飆車，曾樂彤仲拎住道具AK扮悍匪；之後阿Sa又拎住隻道具手扮被打，去到直升機展區時仲扮喺直升機上跳落嚟，睇嚟兩位嘅戲癮完全被呢個展覽勾起喇！事後阿Sa不忘喺社交平台為呢個展覽宣傳，叫大家去支持一下。
喺大館舉辦口《拍住上—光影裡並肩馳騁的我們》電影主題展覽，係由美術指導張蚊與陳詠燊（Sunny）導演合作策劃，當中重塑多個經典港產片嘅震撼場景與動作場面。張蚊曾於訪問中透露，展覽入面高達 99% 嘅展品同場景，都係由團隊重新製作出嚟。
