香港一代戲劇巨匠、著名演藝同文化藝術教育家 鍾景輝博士(King Sir)，6月3日安詳離世，享壽89歲。
King Sir一生奉獻予本地演藝界，足跡橫跨舞台、電視、電影同廣播範疇，更曾任香港演藝學院戲劇學院創院院長、創辦香港戲劇協會同香港舞台劇獎，培育無數台前幕後頂尖人才，在本地文化藝術界德高望重。
親屬今日為King Sir於九龍城浸信會舉行安息禮拜，靈柩隨後奉移鑽石山火葬場進行火葬儀式。雖然今日屬家屬私人活動，但依然體現King Sir廣闊人脈同尊崇地位，政界、演藝界同藝術界大批親友、長輩、學生前來送別。
出席嘅影視界人士包括周潤發、劉德華、杜琪峯、朱茵、黃貫中、鄧萃雯、謝雪心、黃浩然、張國強、韓馬利、杜燕歌、黃建東、連炎輝、彭秀慧、胡美儀、陳淑儀、李力持、莫文蔚媽媽，以及文體旅局局長羅淑佩、霍啟剛等政商界代表。
扶靈名單則包括由King Sir當年加入TVB後嘅第一代合作夥伴蔡和平、杜棋峯、愛徒謝君豪、到演藝學院候任戲劇學院院長，以及King Sir中學同學等唔同界別與年代代表組成，寓意他在演藝界承前啟後、後繼有人。
身為King Sir愛徒嘅王祖藍與King Sir侄子鍾至權接受傳媒訪問，鍾至權指非常感恩天氣尚可，令關心伯父嘅親友同後輩都順利到場送別。佢又透露King Sir一生最大遺願係繼續推廣戲劇，因此家屬決定遵從生前無私奉獻精神，將收到帛金全數撥捐「香港演藝學院-鍾景輝獎學金」，用作培育未來的演藝人才。
談及恩師生前教誨，祖藍感性分享King Sir衡量優秀演員嘅「4個D」標準——分別係Deportment(風度/儀態)、Discipline(紀律)、Dedication(投入/奉獻)同Direction(方向/指導)。
佢回憶當年King Sir評價自己演出時曾指：「做喜劇沒問題，但要學習認真去做(嚴肅正劇)。」祖藍笑言恩師生前非常大度，從不介意被學生模仿，甚至在壽宴時更舉辦過模仿King Sir比賽。
早前TVB重播King Sir經典劇集《甜孫爺爺》，劇中角色患有柏金遜症同阿茲海默症(老人癡呆)，祖藍澄清兩者係完全唔同疾病，現實中King Sir只係動作變慢，但頭腦始終保持非常清晰，近年慶生切蛋糕時仍能精神奕奕同佢一家大細傾偈聊天。
王祖藍最後表示，King Sir徹底改變了無數學生的人生軌跡，作為學生代表，他想送第5個「D」給恩師，就係「Dignity」，祝福King Sir於眾人不捨同敬意中，優雅地謝幕。
家屬亦感謝大觀眾對King Sir關心，宣布7月15日於香港演藝學院舉辦追思會同紀念展覽，翌日會舉辦公眾紀念活動，市民可親臨現場撰寫心意卡，一同緬懷為香港演藝界寫下輝煌史詩嘅一代宗師。