80年代紅遍日本嘅巨星 近藤真彥 ，因為當年日本娛樂圈嘅強大魅力，亦因為當年唔少香港歌手都曾改編翻唱佢嘅作品好似《夕陽之歌》、《千千闋歌》同《幾許風雨》等，所以亦係唔少香港人嘅偶像。
90年代淡出演藝圈轉型為賽車手嘅佢，到2005年重返樂壇，中年再發展繼續強大。而原來中聲歌手 顏米羔 亦同樣係近藤真彥嘅Fans，近日仲到韓國近距離欣賞偶像演出，更獲得同偶像合照嘅機會，米羔仲興奮出post寫道：
係「近藤真彥」呀😍
難得有機會現場一睹前輩演唱嘅風采，便決定韓國快閃幾天！令我最感動係聽到《夕陽之歌》嘅原唱， 又搞著個水煲喇 ！大家細細個睇好多劇都係前輩唱嘅歌，回憶返晒嚟，不枉此行。
有幸走到後台拜訪近藤前輩，近距離，珍貴嘅交流。感受到前輩嘅陽光、溫暖、活力，米仔心跳又加速喇！
原本以為只可以喺後台聽歌，感謝前輩特意安排一席，可以觀眾視覺近距離欣賞演出。
近藤前輩台上嘅演繹活潑激情，令人熱血沸騰，不時又帶點情深，唱到入心，真係陰晴俱備，米仔又學到嘢，謝謝前輩。
第一次到韓國睇Show，感受到樂迷嗰份齊心熱情，現場大家都好守規矩，全場冇人舉電話拍攝，個個都百分百投入，跟住唱跟住跳 ，掌聲喝采聲不斷 (由於全場冇人舉起手機，米仔都唔好意思舉機記錄依個咁一致嘅景觀)。很欣賞依份既熱情又自律嘅支持，嘆為觀止。
祝近藤前輩健康喜樂平安，預祝你生日快樂！