鄭秀文 下星期五就會於啟德主場館，舉行佢嘅一連三場《You & Mi亞洲巡迴終點站》，向來對演出要求極致嘅Sammi，早已處於「地獄式」排練階段，每天揮汗如雨落力練舞，務求以最頂尖嘅體能同舞姿迎戰全新舞台。
Sammi更提前親自前往可容納多達50000名觀眾嘅啟德主場館實地考察，踏足呢個全港最新、最大嘅演唱會場地，Sammi亦坦言內心感到不安，佢寫道：「其實mi跟普通人一樣，也會害怕和質疑自己，但在整個努力的過程，我發現，剩低的，原來我已經戰勝自己（恐懼)。面對觀眾前，首先要正視自己。😊」
佢早前受訪時亦提到，自己係一個到最後一秒仍不停改動嘅人，一定會將原有精髓同全新構思融合，將最好嘅自己交出來。
回顧Sammi上一次喺香港開騷，已經係2024年7月喺紅館舉行嘅13場《You & Mi》世界巡迴演唱會首站。當時佢曾因確診新冠而延期1年嘅考驗，最終憑驚人演出完美回歸。相隔兩年後，今次橫跨多個城市嘅巡演終於嚟到最終站，目前三場門票同主辦單位加推嘅視線受阻位置都被全部掃清，足見演出對Sammi同歌迷都意義非凡。