日本女星 有村架純 一改清純路線，喺新戲中首度挑戰演母親角色。早前有村就同黑木華、南沙良等宣傳新戲，為咗配合戲中嘅黃金走私劇情，佢哋仲展示咗三張純金航空券。
呢次電影去到新加坡進行大規模實地拍攝，更走訪多個著名地標，有村分享自己20歲時，因工作到挪威，而喺24歲完成一個檔期好長嘅工作時，得到一個月假期而重返當地。最初自己一個人，後來先同朋友會合，再次走訪一樣嘅地方。
有村話20歲初次到訪時，對一切都充滿新鮮感，遇上唔同嘅人、睇到各種景色，甚至感動到喊出嚟，所以完成咗好重要嘅工作後，就決定再去，亦係第一次用自己錢再到挪威。
至於黑木華同埋南沙良都有好多難忘嘅旅行經歷，黑木華就喺一次沖繩旅行中考取潛水牌。佢形容置身大海時感覺自己好渺小，有種身心都開放嘅感覺，生活同工作嘅事都可以一掃而空。南沙良就喺情緒低落到咩都食唔落時去到鳥取旅行，食到美味嘅松葉蟹，係人生中食過最好食嘅蟹。