戲劇大師 鍾景輝(King Sir)上月3號安詳離世，享年89歲。佢嘅安息禮喺7月4號早上舉行。King Sir一生致力推動戲劇發展亦桃李滿門，佢嘅治喪委員會由多位昔日演藝學院學生組成，包括影帝謝君豪、王祖藍、張繼聰、劉鍚賢、蘇玉華及丈夫潘燦良、陳國邦、劉雅麗、秦啟維等。
周潤發、劉德華、汪明荃、導演杜琪峯、謝雪心、張國強、鄧萃雯、朱茵及黃貫中、黃浩然、杜燕歌及韓馬利、香港藝術發展局主席霍啟剛、文化體育及旅遊局局長羅淑佩等各界名人都有出席送別喺演藝界中德高望重嘅King Sir。
而電視廣播有限公司、香港戲劇協會、歡樂今宵好友會、萬梓良、張家輝、柳影紅等致送花圈以表敬意。安息禮吉儀印上King Sir生前座右銘︰「做人以誠 待人以敬」，而家屬將會將安息禮嘅帛金全數撥捐「鍾景輝紀念獎學金」。
King Sir嘅靈柩喺早上9點15分左右抵達靈堂，儀式喺10點半正式開始，而扶靈名單就由麥秋、蔡和平、杜琪峯、謝君豪、陳健彬、孫必勝、莫子聰及黃龍斌組成。儀式約於12點半結束，King Sir侄仔鍾至權捧住伯父遺照步出禮堂，King Sir嘅靈柩隨即移至鑽石山火葬場進行火葬儀式；賓客成員隨後陸續離去，發哥就喺另一通道低調離開。
鍾至權喺治喪委員會主席王祖藍陪同下會見傳媒時亦感謝各界出席安息禮，以及宣布月中會辦追思會以供公眾參與嘅紀念活動。鍾至權表示，King Sir一直想推廣戲劇科，希望香港多啲學校有戲劇科。而祖藍對恩師最深刻係從King Sir學到「4D」，包括「Drive（動力）、Diligence（盡心盡力）、Discipline（紀律）、Dedication（奉獻）」。而祖藍喺呢日亦以學生代表身份致辭，更表示：「冇King Sir就冇香港嘅戲劇訓練，冇King Sir就唔會有今日嘅影視圈。」仲希望送第五個D「Dignity」（莊重）俾佢，希望佢可以優雅地謝幕。
祖藍分享對上一次同King Sir見面係喺對方生日嘅時候，帶埋老婆以及囡囡一齊為King Sir慶生切蛋糕同傾偈。祖藍仲話，最近重播《甜孫爺爺》，裡面有一句對白係「栢金遜同老人癡呆係兩樣嘢嚟嘅，你唔好混淆。」King Sir有時都係咁，只係慢啲，但係清醒，仲將每個學生長記於心。祖藍更分享，畢業時收到King Sir嘅勉勵，而對於佢經常扮演King Sir呢件事，祖藍就話：「基本上佢學生都默認有扮過佢，甚至喺佢大壽嘅時候搞過扮嘢大賽，唔同年級嘅學生都有參與。King Sir唔單只唔介意，仲會反問大家『乜我平時講嘢係咁嘅咩？』好鍾意同學生打成一片。」