日本男星 橫濱流星 之前喺影壇大放異彩，更登頂成為日本影帝，令佢人氣同吸金力都暴升。日前佢喺一個代言活動分享人生同事業嘅起點。佢話人生起點係從小學一件級開始練空手道，從中學會毅力同禮儀，成就宜家嘅基礎。
至於演員生涯嘅起點，就係高中二年級時，參演戰隊英雄嘅特攝作品，持續一年嘅拍攝令佢知道咩係演戲，亦下定決心要喺呢行發展。呢兩個關鍵時刻，可以話對橫濱嘅人生有好大影響呀。
橫濱流星近年事業攀上新高峰，工作量經常接近飽和狀態，前排難得放假，經理人同工作人員都叫佢好好珍惜自己時間，叫佢好好休息。雖然佢有去旅行，不過個腦仍然諗住做嘢，仲主動問經理人有冇新嘅工作邀約。佢笑稱自己性格係一條吞拿魚，認為應該要多吸收同刺激，做多啲戲。