以甜美笑容喺《唱錢》人氣急升嘅26歲聲夢小花 李茵彤（Desta），近日趁開拍新處境劇《愛的．回家之三代同糖》之前，飛往泰國清邁度假充電。向來形象甜美健康嘅Desta，大曬一系列清新旅行照，鏡頭下身穿簡約吊帶素色背心薄紗長裙，喺清邁綠意盎然嘅背景以招牌「腰果眼」同無敵笑容融化網友。
Desta呢次清邁之旅後，回港後就將迎接演藝生涯嘅重大時刻，因為佢有份演出，備受矚目嘅全新處境劇《愛‧回家之三代同糖》8月就會接棒《開心速遞》登場。Desta將與大前輩車婉婉、吳若希合作，喺劇中飾演古靈精怪嘅佛系Gen Z「唐芯」。
修讚幼兒教育出身嘅Desta因熱愛演藝事業，2022年參加《聲夢傳奇2》因刻苦練習而獲得「後樓梯歌后」美譽，雖然18強止步，不過次後佢仲同多位戰友組成A Cappella組合「Plan V」繼續追尋音樂夢。直到今年佢喺《唱錢》擔任小助手，憑藉敏捷反應同親民形象一夜入屋，如今更殺入處境劇，繼續展示活潑可愛嘅一面。
