由名模教母徐濤（Murine）名下模特兒學校主辦嘅《Hong Kong's Next Top Model 2026》總決賽，星期日圓滿結束，羅霖 同 曾展望 擔任星級主禮嘉賓。評審團陣容鼎盛，包括徐濤、模二代高靖、名模及儀態導師Ann Ho、香港小姐陸詩韻、設計師Paul Marsa、時裝設計師 Kev Yiu等。
評審團依據台風、自信、服裝演繹、鏡頭感同整體氣場，共五大範疇進行專業評分，務求選出最具潛力、最能代表香港嘅模特兒新星。
徐濤透露今年將重點拓展亞洲市場，並已為多間國際學校嘅幼稚園、小學同中學定期教授 Catwalk 課程。仲指：「培訓新人已不只是一份職業，而是一份使命。」佢又預告9月中舉行嘅時裝表演將增設寵物Catwalk Show，由貓狗同台走秀，為時尚界帶來全新亮點。
今年賽事分為兒童組、青少年組、成人組同熟齡組，參賽者年齡橫跨3至49歲，最年幼嘅參賽者係年僅3歲嘅林澋鉎Kingston，佢以大熱姿態捧走「全球國際傑出大獎」、「兒童組季軍」兩個大獎。而「全場總冠軍」則由青少年組嘅12歲黃思澄Claire勇奪。28歲嘅陳梓曦Athena亦連奪「全球國際華人超級模特兒大獎」、「成人組冠軍」兩獎。
榮獲全場總冠軍嘅黃思澄，將獲港幣1萬元現金獎同價值10萬元嘅超模訓練課程。佢將獲一紙三年模特兒合約，稍後更會代表香港出戰International Next Top Model國際總決賽，仲有機會前往日本時裝周演出，以及參與泰國同韓國嘅時裝表演，全面進軍國際舞台。
