適逢明星足球隊成立40周年，校長譚詠麟與曾志偉率大隊特意飛往曼谷慶祝，任達華、黃日華、衛志豪、戴志偉、李子雄、洪天明、吳岱融、李金凱及盧惠光大仔Jacky等一班志同道合嘅好朋友聚首一堂，順便喺當地度假嘆美食同睇國際足球盛事，盡顯團隊團結與歡樂。
校長同志偉係認識數十年摯友，連日喺社交平台分享多張外遊合照，見校長同志偉全神貫注望電話收睇精彩球賽，校長更點評球賽，可見二人睇得非常投入。
校長喺社交平台分享此次旅行嘅原因，認為與其長途跋涉、舟車勞頓，只為親身睇一場球賽，不如與一班好朋友一同歡呼同拍手，相中見球隊喺當地包咗一個會議室，用投影喺大螢幕睇兩場球賽，現場一邊食宵夜一邊睇波，猶如一個盛大派對。
校長向來熱愛美食，且食量驚人、消化力極強，被冠上「食物焚化爐」嘅外號。呢次曼谷之旅，校長率領眾人享用海鮮大餐、街邊品嚐地道美食，佢哋將美食盡收肚裡之餘，眾人亦不忘分組落場練波。
