林夏薇（薇薇）近排工作忙碌，行程排得密密麻麻，上月底迎嚟39歲生日，亦係工作中度過，薇薇本來打定主意今年就簡簡單單度過，冇諗過一返嚟香港，獲胡定欣、趙希洛、周嘉洛等一班好友為佢慶祝生日，令薇薇感動不已。
薇薇前晚喺社交平台分享聚會合照，見到胡定欣、趙希洛及陳山聰老婆何麗萍（Apple）送上生日蛋糕為薇薇賀壽，「估唔到身邊一班好朋友，記掛住我嘅日子，特意騰出時間，喺我出發航程前、奔波落機之後，夾心抽空幫我籌備生日飯，製造滿滿驚喜」。
周嘉洛與薇薇曾合作拍電視劇《寵愛Pet Pet》成為「姊弟戀CP」，私底下維持極佳友誼，嘉洛大騷肌肉，為薇薇慶祝。薇薇話估唔到遠在外地嘅朋友亦專程從海外寄來鮮花、禮物同滿滿生日祝福，薇薇話雖然相隔異地唔可以碰面，但大家依舊事事上心，佢亦感恩身邊有大家〕，「世事匆忙，有人記掛，便是最大的溫柔。感恩遇見，新歲安好」。見薇薇上載多張合照，但呢啲合照當中，未見其老公莫贊生(Jason)身影！
