TVB歌唱真人騷《中年好聲音4》於6月5號播出新一集，「企鵝人」周志康深情獻唱陳奕迅經典歌《天下無雙》，以溫暖且真摯嘅歌聲演繹，情感投射恰到好處，最終獲得評審肯定，勇奪87分。
重溫《中聲4》激烈比賽過程
阿哥周志文當晚親臨現場打氣，兩兄弟真情流露，感動得雙眼泛淚，場面極其溫馨催淚。阿康喺台上坦言呢首歌係特別送畀孖生哥哥周志文 ，阿康前日喺社交平台貼出兩兄弟由細到大嘅合照並有感而發，分享當初抽中呢首歌嘅心情。
阿康話盲盒一開見《天下無雙》，嗰一刻呆咗，跟住個鼻酸一酸：「因為呢首歌，係我同文仔嘅歌。」阿康回憶與周志文由細相伴成長嘅點滴，「細個嗰陣，我哋孖鋪，打同一部遊戲機，有共同嘅朋友、共同嘅興趣。大個之後，一齊追夢、一齊練歌、一齊捱過低潮。我鍾意嘅嘢，佢都鍾意；佢堅持嘅嘢，我都撐」。
阿康話佢同周志文血濃於水，「文仔多謝你一直都喺度」，就好似兩粒永遠喺同一條軌道上面運行嘅星，「唔會分開、唔會走散，互相照住對方。今次抽中呢個屬於我哋隱藏版盲盒，好似個天都幫我揀咗個最啱嘅方式，去將我哋呢份情，唱俾所有人聽」。
