XiX四位成員Kiele、Crystal、Caitlin同Charlotte，推出單曲〈微笑擊敗全世界〉，隨年月份漸長之後，小朋友逐漸長大，亦開始明白現實中，可能好多事情難以控制。
Eric Kwok指「笑」係XiX嘅大特點：「佢哋咩都可以笑一大餐，而呢份歡樂經常都感染到一齊做嘢嘅人。」而新歌〈微笑擊敗全世界〉MV，就將XiX可愛日常記錄，並由既係經理人又係成長導師嘅Eric親自操刀剪接。拍攝當日天公造美，彷彿上天回應XiX暫別，同時祝福佢哋有燦爛未來。
Kiele話：「我覺得呢首歌幫咗我好多，我一直都係會被壓力壓倒嘅人，呢首歌對我意義重大，唔只係一種說法，係一種態度，一種看待世界嘅方式。有時候事情唔到我哋控制，無論係壓力定掙扎，但唯一可以控制嘅就係你嘅心態，我點樣去看待目前嘅處境。呢首歌對我嘅意義，除咗係一首好好嘅歌，仲因為佢真係幫咗我好多。呢首歌好sweet好窩心，但係佢都提醒咗我有時要退一步話俾自己知，唯一可以做嘅就係微笑以對生活所有事，有時你就只需要呢個態度。」
Caitlin則指：「新歌風格好唔同，亦都係我比較擅長嘅，所以錄音嘅時候好開心好自在。 拍MV嗰日都好好玩，尤其係踩單車嗰部分！我之前學極都學唔識，但係有咗XiX、導演、Eric Sir，同埋成個團隊嘅支持，我最後成功踩咗9秒，簡直係超越咗自己～好感恩有呢個機會，同埋好期待可以分享呢首有美國 Broadway Feel 嘅慢歌，希望大家鍾意啦！」
而Crystal就話：「今次拍MV唔使好攰咁樣係咁跳舞，我哋職責就係露出我哋嘅微笑，食嘢、踩單車、行街，做我哋平時女仔鍾意做嘅嘢，仲有一直以來想做嘅嘢，就係教Caitlin同Charlotte踩單車，同埋幫Charlotte剪頭髮，仲有俾佢哋幫我洗頭，所以成個拍攝過程真係好好玩，」
Charlotte則指：「呢首歌係XiX嘅歌入面對我嚟講最大挑戰嘅一首，錄音過程令我最深刻。同埋今次Kiele一返到香港就陪我一齊練新歌，幫咗我超級多，錄音嘅過程中Eric Sir都令我喺唱歌表達情感呢一方面學到好多嘢。MV成個過程都好歡樂同好享受，一齊掃街同埋嘻嘻哈哈，特別係拍同Caitlin學踩單車。雖然我仲未識，但係有其他三個成員喺隔離陪住我踩嘅感覺好開心！玩到出晒汗！」