Sammi鄭秀文突然宣佈巡迴最終站因舞台故障需延期，不過同日佢老公 許志安 相隔11年後再踏紅館嘅演出，就正式公佈10月將舉行喇。
入行40週年嘅 許志安 近來積極頻繁為演唱會宣傳，早前推出嘅新歌《信天翁》反應不俗，坊間亦再掀起「安歌」回憶熱潮，當中《會過去的》、《昨遲人》、《翻騰》等代表作再度獲得樂迷關注，各音樂平台播放量持續上升。
配合「回歸音樂初心」主題嘅宣傳海報，視覺集中喺簡約光影對比，傳遞「即使只得一支光管，依然能在舞台上發光發亮」訊息。許志安指海報唔賣弄花巧，代表佢對音樂嘅純粹態度。
許志安出道至今累積演繹逾千首歌曲，從中挑選出三場演出曲目係一大難題。自宣布開唱後，安仔收到海量點歌訊息，由早期代表作《唯獨你是不可取替》、《爛泥》，到冷門Side Track，甚至多年未曾現場演繹嘅作品，佢坦言：「好多人私下傳訊息點歌，我心目中都有好多心水選擇。有啲歌我從來未喺紅館唱過，有啲就想用全新編曲重新演繹。」
安仔與導演團隊逐首歌曲篩選：「因為太多歌想唱，但時間有限，每晚只得大約30首，取捨之間真係花咗好多心血。」排練歌曲之餘佢又勤操體能，維持規律健康生活，務求以最佳體態與聲線應付演出。
