當年以Cookies成員身份入行嘅 鄧麗欣 ，歌迷會「Stephy Fantasia」轉眼已成立19周年，日前佢同逾200歌迷於酒店舉行慶祝活動，現場氣氛熱烈。出名寵粉嘅Stephy一如既往同大家玩遊戲、抽獎，當然亦唔少得傾偈同大合照喇。
期間有Fans仲喺問答環節，問起Stephy呢個英文名由來，Stephy就指自細已覺得Stephaine呢個名好好聽，但個人又偏好兩個音嘅英文名，入行後就決定簡化改成Stephy，更還爆學生年代自己曾叫過Rainy。
Stephy笑稱：「大家都知我有幾個閨蜜，其中一個叫做Sunny，而另一個叫做Cloudy，大家估吓我叫做咩？哈哈哈…我叫做Rainy，當時老師Cloudy、Rainy、Sunny咁叫，好容易記得我哋。」
今年聚會加插義賣環節，Stephy捐出10幅畫作予大家競投，Fans間反應超級熱烈，最終合共籌得超過10萬元善款，將全數捐獻兩間本地慈善機構，直接幫助低收入同弱勢社群。
Stephy興奮地話：「今年聚會真係好開心！舊年搞聚會嘅時候有好多人像紙版、易拉架，大家覺得唔好浪費，所以就玩慈善拍賣，點知反應踴躍，歌迷會就話不如每年聚會都可以搞，今年我就攞咗《Secret Garden》中嘅畫作出嚟拍賣，現場反應好熱烈，籌咗好多錢，會全數捐畀兩間本地慈善機構，我覺得好開心好有意思，好多謝大家，希望明年可以再玩過。」 
歌迷會邁向20週年，Stephy笑言渴望打破傳統，舉辦別開生面嘅慶祝聚會，考慮同大家組團旅行嘅慶祝大計：「希望多啲同大家聚會，製造更多回憶，雖然咁多人一齊做嘅活動係有少少限制，要從詳計議一下，不過我做咩都得嘅，我願意同大家一齊玩！好多謝歌迷一直嘅陪伴，今年直情寫咗首歌多謝大家，叫《仍留在這裏》，其中一個最感激嘅當然係粉絲，今年係我入行24年，時間過得好快，歌迷會邁向20周年，記得成立嘅時候，剛開始嘅點滴，話咁快已經20年，多謝大家咁多年嘅支持，互相陪伴住大家成長，係好開心。」
Stephy又透露下半年將推出新歌、新專輯同音樂會：「上年開完紅館、澳門，今年都會有啲計劃，冇一樣嘢比開騷回饋歌迷更好，所以積極籌備，希望唔會令大家失望！」