鄭秀文 剛臨時宣佈演唱會需延期舉行，正一頭煙安排答謝會緩和歌迷情緒嘅Sammi，又有報道傳出，同佢並肩作戰長達26年嘅「金牌經理人」 郭啟華(Wallace)，早前已低辭任經理人職務，告別演藝圈幕後工作提早退休。
今年將步入60歲嘅郭啟華，自中大畢業後就加入商業電台，曾擔任助理節目總監同創作總監，主持過唔少經典節目，屬極受歡迎嘅明星DJ。其後佢轉戰幕後，先後出任華星唱片及東亞唱片高層，1999年與黃耀明、蔡德才等創立獨立音樂品牌「人山人海」，致力推動非主流音樂。
不過，近年最為大眾熟悉嘅，必然係佢擔任Sammi經理人嘅身份。早於2000年起，Wallace就出任經理人一職，同時曾為許志安同彭羚嘅演藝事業打點。在與Sammi合作期間，曾陪伴對方經歷事業巔峰，到感情同健康上嘅考驗，關係深厚如同家人。
前年Wallace曾傳出因突發性中風，被急送ICU，當時Sammi曾於社交平台隔空為其祈禱送上祝福。幸Wallace火速康復，之後更驚喜現身陪伴Sammi出席頒獎禮。
Wallace病癒後曾重返工作崗位，繼續為Sammi個唱同大小事務操心，但歷經大病後有感精神與體力已不及當年。為好好調理身體最後向Sammi提出卸下經理人重任。
