佘詩曼（阿佘）喺演藝圈中人緣極佳，更係好友陳山聰兒子陳霆軒（Jaco）嘅「超級契媽」，不時跟Jaco享受單獨約會，噚日佢貼出一條陪Jaco去玩嘅影片，阿佘為咗同Jaco慶祝6歲生日，全程傾力同Jaco玩餐飽。
阿佘噚日喺社交平台上載同「豆丁」Jaco過正日生日，話當日晏晝原本有Party，但阿佘要開工做嘢去唔到，契仔Jaco約阿佘夜晚食飯，阿佘5點收工即刻去買蛋糕、蠟燭同生日卡，阿佘買齊嘢，即飛返屋企揸車去接Jaco，阿佘喺Jaco上車就整蠱Jaco，送上一隻毛毛兔仔作禮物，阿佘笑指Jaco講明要超級英雄Doctor Strange，「我就係想睇佢勁失望嗰個樣，點知佢掩飾得好好，仲開開心心咁同老豆say bye」。
阿佘與Jaco直奔室內遊樂場，入去玩雪、射槍、玩波波池、碰碰車，Jaco玩到就嚟閂門都唔捨得走，搞到夜晚9點都未食飯，跟住佢哋去快餐店食薯條，「（心諗：唔係玩嘢係嘛，我收工化晒妝點搞呢？)不過冇計啦，正所謂生日大晒，所以我哋最後就去咗食🍔🍟」。
阿佘再揸車去咗Jaco屋企附近公園進行簡單而隆重嘅切餅儀式🎂，等準備送「驚喜」畀Jaco，阿佘話Jaco見到當然好開心，阿佘仲話Jaco今日超長氣：「其實仲有好多點點滴滴都好搞笑、好可愛嘅，只係不能盡錄，希望佢會記得六歲生日嗰年，有我呢個契媽陪佢過啦～」Jaco收到禮物後更錫契媽咀嘴！
好友林盛斌（Bob）留言話過多兩個幾月就係自己生日，叫阿佘唔使玩遊戲、唔使送禮物，「淨係要最尾錫嗰下得㗎啦」，唔少網民回覆話阿Bob諗得太多，仲叫Bob向Jaco爸爸陳山聰索吻。
