陳豪（阿Mo）與愛妻陳茵媺（Aimee）呢日現身一間銀行嘅私人財富中心開幕典禮，阿Mo為該中心特製兩款獨有口味嘅咖啡供貴賓享用，阿Mo話其中一款口味係Aimee好鍾意，另一款就帶有朱古力味加三款咖啡豆，口感好有層次，飲落絲滑帶點苦甜。
阿Mo平日工作繁忙，將理財重任交畀專業人士，太太Aimee則主力向仔女灌輸財富理念。Aimee覺得小朋友學識儲蓄及點樣分配使費，譬如去旅行畀佢哋少量零用錢，自己去決定想買啲咩。
Aimee嚟緊暑假為仔女安排興趣班，仔女長大各有各要求，大仔Aiden目前學AI程式編寫、二仔Nathan學數、細女Camilla鍾意睇書。Aimee每年均帶仔女返加拿大探親，但今年外公外婆都喺香港，一家人留喺香港玩。
Aimee仲爆阿Mo暑假要忙開工拍劇，冇時間陪小朋友，阿Mo笑指忙拍劇通常都不見天日，呢段時間真係要交畀太太照顧小朋友！