新劇《非份之罪》推出一星期收視口碑雙贏， 朱敏瀚 戴祖儀 游嘉欣 賴慰玲 葉靖儀 現銅鑼灣鬧巿，快閃派禮物答謝觀眾，吸引眾多途人圍觀支持。劇中飾演一對嘅朱仔同游游更擺出甜蜜甫士延續CP感覺。四位演員又公布收視報捷，劇集成為2026年截至7月為止，首周最高收視劇集。而適逢7月8號係Winki生日，大家亦喺呢個快閃活動為佢送上蛋糕驚喜慶生。
劇集收視比起之前嘅《飛常日誌2》更上一層樓，朱仔、游游同Joey三位都有份喺兩套劇集演出，獲封「收視福將」。朱仔就話，一切要歸功於吳啟華，21.8點嘅收視有20點都係為啟華哥而嚟。
朱仔同游游喺劇中飾演CP，亦得到觀眾嘅好評。朱仔就話，覺得自己三年前個樣好嫩口，仲可以同嘉欣做一對，但而家已經老喇！不過Joey就話流行父女戀，所以都冇乜問題。朱仔仲講笑，話嘉欣表示由細睇就睇佢演戲，所以第一次合作就做女朋友，之後可以就做家姐，再下次就可以做佢阿媽。 朱仔之前因為戲劇收視好，所以赤膊上身派福利。Joey呢次就話：「上一套劇係上半身，下一套劇……」雖然朱仔就答：「人都有分前面同後面，上次張相都未見到後面。」但估唔到游游嘅要求更大膽，話要睇大脾肌肉，令朱仔眼都突埋。
賴慰玲同 葉靖儀 主演嘅單元故事「石棺藏屍」今個星期播出，Winki出演婚外情角色，而Michelle由拍攝綜藝轉戰拍劇，戲份都唔少。Michelle就話，有Winki以及鄧志堅同場，自己心情都輕鬆同開心啲。Winki仲話Michelle為角色設計小動作同情節，會問佢哋好唔好咁做，大讚Michelle好勤力。
《非份之罪》星期一至五晚 20:30 翡翠台