羅啟豪 近日同一眾「豪殻」聚首一堂，除咗慶祝早前紅館演唱會圓滿舉行外，亦都慶祝「豪吧」成立三周年。Ramon嘅一班中聲好友顏志恒、劉威煌、丁文俊，涂家堯、梁浩賢以及Ramon嘅表姐等都有到場，而Ramon仲同Benson以及威煌一齊上台Jam歌助興。
由於活動場地有限，Ramon只可以招待150名「豪殻」參與。心情大靚嘅Ramon滿場飛同大家舉杯暢飲之外，又同大家一齊切蠔殻蛋糕。Ramon都話呢三年間自己嘅人生有好大蛻變，亦好感恩豪殻們一路以嚟不離不棄嘅支持，因為一路以嚟都唔容易，大家每次嘅鼓勵都俾咗好多信心佢。
除咗「豪殻」之外，Ramon話家人都比咗佢好大嘅動力，令佢更有勇氣去追夢，更可以踏上紅館舞台，所以家人支持都令佢感到驕傲。而最令Ramon感動嘅係得到爸爸一個搭膊頭嘅鼓勵，因為爸爸好少咁做，所以爸爸做咗呢個動作都令佢好感動。
