楊明 同 莊思明 將於8月2號喺馬來西亞吉隆坡舉行婚禮，距離大喜之日剩返唔夠一個月，一對新人籌備婚禮之餘，同時都要為處境劇《愛・回家之開心速遞》埋尾。
之前楊明講過8月喺大馬舉行嘅婚宴，主要喺宴請雙方嘅家人，之後先會擇日再喺香港大排筵席，不過《愛回家》一眾台前幕後似乎急不及待要飲佢哋呢餐喇！趁劇組上下齊人開工，大家臨時將電視城餐廳變成宴會廳，喺豹哥 單立文 帶領下率先為一對新人送上祝福。
正當全場起哄要求一對準新人錫錫時，思明就叫豹哥代吻男友，豹哥相當畀面準新娘，一啖錫咗落楊明個嘴度，令在場眾人睇到O晒嘴。不過相信大家最想睇到嘅，應該都係楊明同Lisa甜蜜嘅錫錫畫面，最後一對準新人互錫臉頰後，再喺 阿蟹呂慧儀 嘅「幫助」下，喺大家面前嚟個幸福親吻，兩人仲笑言安排咗人情箱喺門口收人情。
