資深節目主持及一代新聞主播朱維德離世，享年95歲。各界對朱翁嘅離開都心表惋惜， TVB娛樂新聞台第一時間聯絡上朱太Hazel，並獲證實朱翁於7月7號近中午時間，在護老院安詳離世。

朱太難掩傷感之情，憶述於7號上晝如常到護老院探望丈夫，大約11點時仍親自餵朱翁午饍，期間朱翁突然對住佢好開心咁笑咗一笑，呢個久違嘅畫面令朱太大感愕然，但下一秒朱翁就瞓着再無反應。朱太表示朱翁於四年前因為認知障礙症而入住護老院，身體狀況亦慢慢轉差，直至近半年開始認唔到人，甚至連朱太都再認唔到。對於朱翁嘅後事安排，朱太表示家人已着手辦理，將會以簡單形式舉行。

朱翁於圈中獲得眾多後輩敬仰，曾經同佢合作亦係朱翁師弟嘅鍾志光，得知消息後感到突然同悲傷。鍾Sir指朱翁係佢教育學院嘅大大大師兄，早前學院70周年時，學院曾經想透過佢聯絡朱翁寫回憶錄，而朱翁以記得唔清楚為由婉拒，當時朱翁曾透露自己都係老人病。

人稱朱翁嘅朱維德生於廣州，對歷史及地理有深厚研究，亦係香港歷史文化掌故嘅研究者。朱翁喺發展演藝事業嘅同時，亦有推出著作及寫專欄分享。朱翁不言休，朱太指丈夫好動，只要對方有體力有精神就會繼續做。

朱翁早喺60年代時投身無綫，成為開台首十名員工之一，初期擔任晚間電視新聞主播，由於學識淵博，朱翁獲邀加入公司文教、旅遊、體育節目等發展。擅長主持資訊節目嘅佢，將專長發揮得淋漓盡致，好似當年嘅《大江南北》、《歡樂今宵》、《體育世界》、《婦女新姿》、《都市閒情》等都有朱翁嘅身影，當中最長壽嘅節目主持，就係做咗二十幾年嘅文教節目《文化廣場》。朱翁性格樂天好動，面對工作同生活一樣擁有無比毅力，即使一把年紀都與時並進，努力去習科技化嘅社會，無懼年齡局限，值得尊敬。

而熱愛旅遊探索嘅朱翁喜歡周遊列國，好多時都會做導遊帶團，喺2013年時佢就舉行過一場見面會。除咗主持身份，朱翁亦同時參與劇集演出，嘗試唔同嘅人生，曾於TVB劇集多套劇集中演出，包括有《甜酸爺爺》、《天天天晴》、《原來愛上賊》、《愛・回家之開心速遞》、《不速之約》、《宮心計2深宮計》、《金牌冰人》、《潮爆大狀》等。

朱翁效力TVB達53年，喺《萬千星輝頒獎典禮2014》上獲頒「專業演員大獎」，表揚佢對業界嘅貢獻，朱翁笑言如果有年紀最大而經常上鏡獎，佢應該可以奪得，因為佢年紀比胡楓同羅蘭更大，佢又贈首詩給大家「人生七十古來稀古稀金不稀八十路上隨處是過百又何奇。」