MC張天賦 一連五場紅館騷7號晚正式開鑼，出道短短五年幾，已經開第二個紅館騷，唔止有大批粉絲支持，仲有唔少前輩送花籃祝賀，包括劉德華、成龍、鄭伊健、梁詠琪、張敬軒、陳潔靈等。一開騷MC就送上連串勁歌熱舞，舞技明顯大躍進，睇得出佢落咗唔少苦工。
頭場MC請來同門好友 陳蕾 做嘉賓，除咗獻唱佢哋嘅合唱歌《永久損毀》外，二人仲分享初次見面嘅趣事，MC自爆第一次見到陳蕾就話喜歡人哋，點知陳蕾話MC畀佢印象係口花花，係個撩姐姐嘅死𡃁仔。
演唱會中段，紅館舞台變成熱鬧馬戲團，不過歡樂氣氛突然又被暗黑氛圍籠罩，MC企上廢棄校巴車頂，孭住結他自彈自唱，展現搖滾爆嘅一面。
