車婉婉話咁快已經投入TVB新處境劇《愛．回家之三代同糖》拍攝，身兼《中年好聲音4》主持嘅婉婉，近日又要參與慈善節目演出，工作真係忙過不停，婉婉日前趁空檔就帶咗囝囝BBQ一齊到泰國暑假親子樂，仲罕有大解放，上載比堅尼度假照。
期間仲發生一個偶遇，婉婉喺曼谷撞到明星足球隊踢波，於是婉婉帶埋BBQ上前同各位見面，BBQ更換上球衣踢波似模似樣，見到有份落場嘅譚詠麟、曾志偉、黃子華、洪天明、李金凱、劉洋等，位位Uncle都好錫BBQ，有網友仲留言話BBQ小朋友同粒粒巨星踢足球，好幸福啊﹗
婉婉解釋初入行時，有幸常常跟「明星足球隊」周圍去踢波、做啦啦隊、去現場睇球賽，留下滿滿回憶，30年後呢日估唔到喺曼谷偶遇「明星足球隊四十周年曼谷之旅」，婉婉馬上歸隊。
婉婉形容今次感受相當特別，因為今次仲帶住BBQ先生，同啲長輩玩、食飯、睇波，仲帶埋佢去踢波、落場比賽、射12碼，龍門哥哥又送咗對手套畀阿仔，令婉婉覺得太開心、太幸福，真係好難忘呀！婉婉亦多謝各位哥哥、Uncle嘅照顧，令兩母子旅程劃上繽紛色彩。
