曾為陳欣健執導嘅電影《平安夜》擔任美術指導，並贏得第5屆香港電影金像獎「最佳美術指導」獎項嘅資深電影人 陸叔遠（Robert Loh），日前驚傳於波蘭外遊期間與家人失去聯絡。消息於電影圈及社交網絡瘋傳，大批電影從業員及網民紛紛轉發尋人啟事，於FB更創建咗「🚨 尋找陸叔遠在波蘭🚨」群組，呼籲大家幫忙。
藝術創作者莊丹妮數日前喺社交平台發帖，指與正於波蘭旅行嘅好友陸叔失聯：「我同瑞典朋友 Ami Stylander 成個weekend冇咗陸叔 Robert Loh 在波蘭的消息，非常擔心，如果佢有聯絡大家，請佢務必打返畀我，佢電話已經冇開兩日😞 最緊要人平安🥹」
消息發出後，莊丹妮未聯絡上陸叔，故8號佢再次以中、英文發出尋人post：「🚨 急！緊急尋人：朋友 Robert Loh（陸叔）在波蘭克拉科夫失蹤 🚨各位歐洲的朋友，拜託幫手擴散呢個訊息！我的朋友 Robert Loh（陸叔遠） 自 7月3日 起在 波蘭克拉科夫（Krakow, Poland） 失去聯絡，最後出現地點為 Galleria Krakow 一帶。至今已數日沒有消息，家人同朋友非常擔憂。」並附上陸叔的個人資料、波蘭警方（緊急）電話、波蘭失蹤人口熱線、香港入境處「協助在外香港居民小組」24小時熱線 及 WhatsApp/微信求助熱線。
尋人Post一出後，劉天蘭等多位電影從業人員均有轉發，而FB上更建立「🚨 尋找陸叔遠在波蘭🚨」群組，當中有各地不同語言嘅尋找陸叔帖文。而香港入境事務處亦證實已接獲相關家屬求助，目前正積極跟進事件。
陸叔遠（Robert Loh），1970年畢業於美國⻄北大學（NorthwesternUniversity）廣播電影電視系。回港後曾擔任TVB電視節目製片及導演，之後亦曾於廣告公司任職，又試過擔任男裝設計師。
1985年經介紹下，陸叔遠為陳欣健執導嘅《平安夜》擔任美術指導，於電影行嘅處女作即奪得第5屆香港電影金像獎「最佳美術指導」榮譽。之後陸叔遠又曾為柯星沛執導嘅《歌者戀歌》、甘國亮及梁普智執導嘅《繼續跳舞》及徐克執導嘅《順流逆流》等電影擔任美術指導。