資深演員 梁愛 於7月8號在內地一家老人院因病離世，享年87歲，據知其家人已為愛姐辦好身後事。愛姐於去年不幸被確診患上被喻為「癌中之王」嘅胰臟癌。面對呢個極大打擊嘅消息，愛姐以堅強同豁達態度面對，早已看破生死嘅佢，仲講過祝佢長命百歲係等如同佢過唔去，因為佢覺得死得快好世界。愛姐患病後決定與癌共生，拒絕接受任何治療，希望喺沒有任何痛苦治療下，以最自然平靜嘅心情面對人生終結。
愛姐從事演藝事業超過半世紀，有「御用工人」之稱，因為喺多套作品中，佢都係飾演工人，雖然角色未必顯眼，但佢嘅貼地演技同談吐，令觀眾留下深刻印象，大家以後可以透過劇集去緬懷梁愛嘅一生。經常去探望愛姐嘅楊紹鴻，亦發文寫上「呢次係最後一次見你，無語。親愛的愛姐，一路好走，有緣嘅話，我哋下輩子再合作。」
