洪永城 同老婆 梁諾妍 趁暑假帶同兩女兒Sir Face同Sir Nose一齊到日本親子旅行，唔單止闔家著上家庭裝展示溫馨一面，家姐同妹妹更不時以姊妹裝出動，可愛到爆。兩夫妻仲唔怕辛苦同女兒騎住膞馬四圍走﹗
今次Tony同Inez為兩女計劃咗個好充實嘅行程，全部都非常啱小朋友玩，好似去水族館睇海洋生物、喺迷你豬餐廳親親小豬、又一齊餵雞仔、更去到動物園親親小動物餵羊仔，見Amber同Beryl都好大膽勇於嘗試，臉上流露住一副天真燦爛嘅笑容，相信呢個畫面就係父母最開心嘅時刻喇。
Inez呢輯旅行相仲同大家分享洪家樂遊遊嘅趣事，佢同Tony最初都擔心帶兩個女坐飛機有困難，但幸好一切都順利度過，除咗小朋友嘅行程玩得好開心之外，Inez自己都有爭取購物時間：「阿媽癲咗瘋狂大掃貨，買咗成喼嘅衫俾佢哋，都買咗好多個玩具同零食俾Molly豬。」
今次大女Amber仲親身體驗唔同嘅職業，學習照顧小朋友，見阿女好細心似模似樣，媽媽Inez貼心大讚好cute。兩夫妻亦帶埋小受友去公眾浴場浸浴，踩吓單車好寫意又過一日。
另外，Tony將自己三十幾年前買第一部單車嘅兒時回憶同網民分享，仲帶咗兩個女去咗同一間老店體驗懷舊一番，Inez都留言話：「我細個都係喺呢度買玩具，點解冇見過你嘅？ 」Tony回覆：「你真定假唔好老吹喎 ﹗」夫妻隔空傳情。
