羅孝勇 近年返成長地澳洲攻讀脊醫課程，老婆 王丹妮 就帶住女兒繼續留港工作，夫妻雖然分隔異地，但佢哋一有空檔就會重逢表現仲鬼咁恩愛。
近日Sheldon暫時放下學業，由澳洲返港同老婆阿女相聚，並上載家庭照話：「Went back to HK to visit my 2 favorite people. So proud of my little girl.返香港探我兩位最愛嘅人，為我的小女孩感到驕傲。」
原來Sheldon今次返港主要目的，係阿女話咁快就小學畢業，Sheldon同Louise特別抽時間見證呢個重要時刻，佢哋仲送上鮮花同一個畢業公仔俾阿女，一家三口合照非常溫馨，Louise流露一臉安慰嘅表情，三口子非常幸福。
除咗畢業禮之外，原來阿女仲獲得油尖旺區傑出學生獎勵計劃嘅傑出學生獎，明顯學業成績不俗。
雖然女兒並非Sheldon親生，但佢早已視為己出看待，對阿女愛護有加，由同Louise相戀至今，建立咗良好嘅父女關係，佢哋有時嘅合照仲會做出扮鬼扮馬嘅表情，由鏡頭睇得出呢份難得嘅愛。好多粉絲同網民都激讚Sheldon係少之又少嘅好男人，大讚佢係暖男。而見Louise大約一星期前上載照片表示新作開心煞科，估計佢都計劃咗呢段時間留俾屋企，好好享受家庭樂。
