《中年好聲音3》參賽者 陳芷盈 於社交平台悲傷宣佈，年邁父親星期日離世。一向極為重視家人、孝順又顧家嘅芷盈，發文悼念父親，字裡行間充滿不捨與感激。
陳父近年身體狀況一般，而芷盈自2025年初參與《中年好聲音3》期間，陳父病情已開始走下坡，頻繁進出醫院。芷盈曾透露，爸爸每次獲准出院返家，第一時間就係回味佢比賽中演唱過嘅歌曲，包括《領悟》、《心有獨鍾》、《So You Would Come》同《小天使》等，堪稱囡囡最忠實嘅歌迷。
芷盈亦提及過，非常感激父親自小帶領佢到教會認識信仰，並全力支持佢用歌聲祝福身邊人。
佢於帖文中分享多張過往生活照，可見芷盈自細就同父親關係緊密，佢亦談及父親離世情況，芷盈感觸寫道，星期日下午當時TVB節目正播放芷盈嘅見證片段，畫面更出現爸爸嘅照片。不過同一時間「天父將父親接走」，令佢無須再受病痛折磨。芷盈坦言希望將來能在天堂與父親「約定再一齊唱詩歌」。
佢又寫道：「多謝爸爸好愛好愛媽媽、芷盈同妹妹🫶🏻我哋都好愛你❤️永遠懷念你👴🏻👐🏻」又向一直悉心照顧父親嘅醫護人員、牧者、弟兄姊妹以及親友致謝，感激大家嘅關心與禱告。而一眾《中年好聲音》好友同網民亦紛紛留言安慰。
