今日傳出橫跨香港演藝圈超過半個世紀嘅傳奇巨星，謝賢離世消息，四哥近年鮮有公開露面，享受退休生活，因年事已高，出入依靠輪椅代步，但四哥每次現身仍然腰板挺直，多年嚟巨星風采依舊。
謝賢於1936年出生，因家中八兄弟姊妹中排行第四，加上喺經典劇《千王之王》飾演「羅四海」一角，故行內被尊稱「四哥」，其以英俊瀟灑、風流倜儻嘅魅力，多年紅遍華人地區…
四哥多年前喺節目接受著名主持葉特生訪問時，講到佢擁有懾人嘅男人魅力，四哥當時笑笑口話：「正如黃霑所講，魅力是沒法講，我都唔知從何講起，應該廿幾歲先開始有型，我十幾歲時好瘦好唔型。」
節目中亦播出四哥出演多套經典劇集，包括《樓下閂水喉》、《千王之王》、《紅顏》等，當中喺1981年嘅劇集《紅顏》裡面，四哥飾演萬世年一角，同黃淑儀有對手戲，角色喺個風流倜儻嘅名流，四哥受訪時剖析高世華鍾意同朋友飲酒傾偈、鍾意遊艇、靚車、靚女，同現實中嘅佢一模一樣。
四哥亦分享獲得《最有魅力男士美譽》感受，當時仲話會將狀同獎品留起，俾第日嘅仔女欣賞。事實上四哥多年嚟最注重嘅就係衣著外表，佢喺2008年時喺TVB節目《向世界出發》中曾經表示，有時望到塊鏡都自問謝老四你成七十幾歲仲著成咁？但轉頭會同自己講，因為我係老四，我著得起﹗男人靚唔靚仔唔緊要，最緊要係瀟灑勝於一切。