謝賢原名謝家鈺，由於家中八兄弟姊妹中排行第四，故喺影藝圈有「四哥」之稱。四哥生於富貴家庭，其祖父謝焜彝喺廣東番禺經營銀號生意，係番禺名士同廣華醫院董事，後因戰亂問題而移居香港。
四哥唔鍾意讀書，於是16歲經朋友介紹下考入嶺光公司演員訓練班，翌年轉投迪華公司，正式入娛樂圈，當年四哥外形高大樣子俊朗，入行後人工比一般新人算係不俗，當年佢作客K-100時亦親自講述自己入行經歷，第一部戲已經做男主角，第一次出糧已經有150元，記得當時只係3元一碗雲吞麵。
四哥活躍於黑白電影時代，成為當紅小生，從影到70年代中期，參演電影超過100部，產量豐富，經典作品包括《難兄難弟》、《含淚的玫瑰》、《金石盟》、《黑玫瑰》、《英雄本色》等，紅遍東南亞。其中《難兄難弟》可以話係經典中嘅經典，多次被改編成電影同電視劇，而四哥喺角色中入型入格嘅演繹亦被譽為可一不可再。
四哥喺60年代時，同張沖、陳自強、陳浩、鄧光榮、秦祥林同沈殿霞組成「銀色鼠隊」組合， 紅遍港台，及後開設了「謝氏兄弟影片公司」，更首次嘗試執導電影做編劇，包括《明日天涯》及《冬戀》等，電影事業喺60、70年代最為輝煌。到70年代後期，四哥轉戰電視圈，名作包括《千王之王》、《千王群英會》同《萬水千山總是情》等，仲同汪明荃成為經典熒幕情侶。
喺1988年四哥舉家移民加拿大，93年回流香港，亦間中以玩票性質參與電視及電影製作，當中有《少林足球》、《黑白森林》及《太極2英雄崛起》等，其中在周星馳電影《少林足球》嘅魔鬼隊教練強雄一角甚為搶鏡。電視方面佢亦有同胡楓、曾江、Joe Junior拍攝綜藝節目《四個小生去旅行》，喺記招會上怒摑曾江成為一時熱話。
入行60多年，四哥分別喺2014年同2019年獲香港電影金紫荊獎同香港電影金像獎頒發終身成就獎，以表揚佢既貢獻，而喺2022年，佢亦憑同馮寶寶主演，林家楝編劇《殺出個黃昏》，突破多年除黑照「框框」示人，演繹一個殺手淡出黃昏嘅故事，獲得香港電影評論學會大獎最佳男演員，亦係佢從影以來首個影帝獎項。
四哥多情形象亦由戲裡發展到戲外，佢曾經接受訪問時指每一段感情都專一。最為人熟知嘅戀情包括喺黑白電影時代，同合作無間嘅嘉玲相戀，到1974年，同甄珍喺香港註冊，可惜婚姻只維持了3年，之後喺拍劇時邂逅前妻狄波拉，喺1979再婚，之後狄波拉為四哥誕下謝霆鋒同謝婷婷，謝氏一家嘅生活亦經常曝光，兩個小朋友從小到大都經常作客電視節目。
雖然四哥同拉姑喺1995年離婚，不過二人再見亦是朋友，四哥作客節目時更大爆自己同拉姑的確性格相當極端，但悲劇無法預料，因為當一對戀人相愛時總抱有期望，笑言：「點知俾佢飛咗我，不過我覺得我現時都好幸福，成日同人講仔大女大，老婆又嫁埋，我同拉姑老公都不時打波，好似我初戀嘉玲，佢結婚後我哋都好好關係，不時都會見面，又同佢老公打牌。」
及至2005年，69歲高齡嘅四哥再入情關，與當時23歲內地女子Coco相戀，年紀相差足足46年，拍拖12年分手。
此外，四哥注重養生，對身型同打扮都好講究，佢一身黑西裝、皮手套、樽領衫、黑超永不離身嘅造型早已成為四哥嘅人生招牌。
