陳瀅 早前喺社交平台狂曬喺泰國工作期間拍攝嘅火辣泳裝照，大騷招牌極致身段，令一眾網民大飽眼福，不過Jeannie嘅派福利之旅原來仲未完結，近日佢再公開全新影片，似乎工作過後，已經開始佢早前提過嘅假期，開始馬爾代夫嘅度假之旅喇。
早前Jeannie已事先張揚指會到當地度假，而由佢曝光嘅最新片段所見，Jeannie身穿白Tee，一面甜美笑容嘅佢邊步入清涼嘅海水，邊手舞足蹈除低T恤，大方展現玉背，之後更興奮撲入水中暢泳，玩得不亦樂乎。
Jeannie喺水中轉身望向鏡頭時，更展露出極為燦爛嘅笑容，幸福到不得了。唔知今次Jeannie笑得咁甜，到底係同邊個一齊去玩呢？
Jeannie早前出席活動時，提到喺結束馬爾代夫悠閒假期後，將飛返加拿大溫哥華探望親友，繼續好好休息充電。而佢亦提到預計9月份正式重返幕前，全情投入全新嘅工作。