張敬軒 一連三場《UNPLUGGED 2 第二樂章音樂會》星期五晚起於澳門揭開序幕，軒仔今次與樂迷純音樂交流。又特別向對自己影響甚深嘅音樂廠牌「滾石唱片」致敬，翻唱多首經典之餘，又毫無預警首唱未派台新歌同即場首播MV。
音樂會一開場，以沉浸式行為藝術體驗為演出營造獨特氛圍，軒仔又向觀眾解釋今次演唱會初心：「呢個UNPLUGGED 2演唱會可以喺17年之後、喺就嚟打風嘅weekend舉行。」佢指近年不停做演唱會，所以今次想做自己喜歡嘅表演：「今晚呢個音樂會應該可以話係一個好private嘅concert，我淨係想有一個好好嘅舞台、好好嘅配套、好好嘅音樂總監，同埋好好嘅觀眾，安安靜靜咁樣有個好靚嘅場地，喺呢度好好地、好放鬆咁唱吓歌。」
軒仔又同樂迷分享音樂成長旅程，提到自己成長時期已係超級樂迷，會跟唔同唱片公司聽歌，最沉迷就係「滾石唱片」：「有好多我好鍾意嘅歌手，有哥哥張國榮、憶蓮、辛曉琪、有我嘅偶像李宗盛先生。以下呢個Chapter我將佢命名為『我的滾石時代』。」之後演唱林憶蓮嘅《不必在乎我是誰》前仲感性話：「呢首歌細個聽冇乜感覺，覺得好好聽，Melody好靚，但係每一次我都唱唔晒，希望今晚可以忍住啲眼淚唱得晒。」之後更一口氣獻唱《明天我要嫁給你》、《飄洋過海來看你》及《愛我別走》。
Encore環節，軒仔再次出場就被觀眾待瘋狂叫加場，軒仔即場獻唱未公開新歌，再一不離二即場首播MV，又透露每晚都會唱一首唔同嘅新歌，令樂迷充滿期待。
演唱新歌前軒仔收起笑容，分享新歌《靈魂相願》嘅沉重故事。佢話2024年初覺得自己係全世界最幸福嘅人，後來就成為人生最大考驗嘅一年。佢透露當時經歷兩個重大打擊：「第一個打擊就係屋企最後一隻寵物，我喺香港咁多年陪伴我嘅最後一個伴，貓貓Leslie走咗，到年底嘅時候我好親愛、好似一個屋企人咁樣嘅一個Mother Figure，我哋英皇娛樂嘅CEO Shirley離開咗。」
軒仔坦言2025年開始感到茫然，直至完成上次澳門演唱會後休息一段長時間，先敢「喺個回憶嘅櫃桶入面攞返一啲要去處理、要去面對嘅情緒出嚟。」又提到呢首歌一直收埋，寄語觀眾：「我哋人生當中最大嘅課題就係學識喺長大過程當中，慢慢去同自己最愛嘅人、最愛嘅事去say goodbye。情緒係痛苦嘅，但當我哋識得將佢面對、將佢釋懷嘅時候，可以化為另外一種能量。」