資深演員 梁珊 7月1號與世長辭，家屬星期五為佢設靈，珊姐嘅靈堂外放有一張佢年輕時嘅黑白相，並寫上「永遠懷念珊姐」，靈堂佈置以白色同淡紫色為主，珊姐嘅遺照被淡紫色玫瑰包圍，而堂內設有2台大電視播放珊姐生前嘅劇照、生活照，供親友作最後懷念。
靈堂內外放滿各界致送花圈，包括，成龍集團、劉德華、苗可秀、斑斑、江美儀、劉錫賢、白茵、香港演藝人協會等。珊姐嘅兒子Alex王宇澄接傳媒訪問，向大家交待媽媽係因為心臟病而突然離世，離開時家人都有見最後一面，佢話媽咪臨終前交待要佢哋姊弟好好過生活，佢亦透露媽咪生前最滿意嘅代表作係TVB劇集《楚留香》中飾演嘅石觀音同劇集《四海一家》。
同珊姐女兒係小學同學嘅張崇德，亦親自送別前輩，佢都覺得珊姐嘅離去好突然，對上一次見面係幾年前喺街度撞到，當時仲話得閒飲茶，但已經變成做唔到嘅事。
