62歲嘅 劉錫明 長居內地多年，不過近期不時喺香港出席活動，呢日佢現身動漫展就同大家分享近況，佢話喺內地都有參與幕前演出，問到有冇意願返香港發展，劉錫明就好坦白話有：「不過都要有人請先得。」
呢日同場仲見到湯寶如、林雅詩、女團Honey Punch等。移居英國嘅林雅詩大半年前返咗香港，呢日見佢身邊有位男士相伴，不過佢就否認拍拖，只以護花使者形容對方，林雅詩透露因為難以適應英國嘅生活，所以先回選擇回流香港，尤其阿仔已經考上心儀嘅大學，所以自己可以返香港試下繼續發展娛樂事業。
呢日適逢Honey Punch出道一週年，諗返過去一年粉絲對自己嘅支持，六個女仔都覺得好感動，隊長Casey更坦言過去一年次次出活動都好緊張，因為聽到粉絲支持嘅聲音，先可以安心表演。
