現年44歲嘅TVB旅遊達人 梁芷珮 Christy ，與攝影師老公Kenneth育有兩子一女，一家五口生活幸福美滿。日前Christy喺社交平台PO出大仔Brendan啲畢業相，唔經唔覺22歲嘅Brendan已經港大畢業喇！
Christy喺帖文中寫道：「我個oppa大學畢業喇！百感交集中🥹阿媽真係好開心！你由細到大都咁乖，冇嘢要我擔心，所以我就算咁細個生你都唔會徬徨，大個咗仲識得照顧返我地（哋）轉頭❤️終於大學畢業喇，要正式做大人喇！不過做大人唔容易㗎，記住千祈唔好俾壓力自己，所有嘢都要正面咁去面對，感恩，記住屋企人永遠都係你嘅後盾，就算遇到乜嘢難題，都一定會解決到嘅！」
Brendan絕對係「文武全才」，佢喺國際文憑大學預科課程（IBDP）中考獲34分嘅佳績，起初已獲加拿大多倫多大學社會科學學系取錄。不過 Brendan 最心儀嘅始終係香港大學（HKU）嘅新聞學學士課程，成功入讀港學新聞學系後，去年就以交換生身份遠赴丹麥留學。
除咗學霸身份外，Brendan嘅運動細胞都唔弱，曾兩度入選港隊，最初為「香港高爾夫球會」青年軍，並憑藉高爾夫球獲取運動獎學金，成為高爾夫球港隊代表。而喺 高爾夫球退役後，Brendan就轉戰軟式曲棍球（Floorball），並再次成功入選成為港隊代表出賽。
