顏志恒 魏嘉信 同 林兆霞 三位大朋友，聯同200位4歲至16歲小朋友演員，下月中將會合演四場音樂舞台劇《我們都in過的第一志願》。踏入暑假後，Benson、Cris同阿june就開始密集綵排，雖然因為颱風「紅霞」令每日綵排被迫取消。不過Bendon同Cris兩位男主角，就依舊風雨不改，照樣綵排，因為今次Benson同Cris都係「父子檔」上陣演出，所以就算風暴影響，都可以同囝囝喺屋企排練。
Benson同Cris都係首次挑戰擔任音樂劇男主角，今次既要唱又要演，佢哋就話會盡全力做到最好喇，Benson話：「其實我前幾年有參與過呢嗰劇，但當時只係一個閒角，今次就真係擔正男主角，所以我已經閉關，日日練歌背對白。點知今日仲要打風，冇得去綵排。但因為阿仔已習慣咗9點要去綵排，所以今朝我哋兩個就索性喺屋企排。」
而Cris就話：「其實我好好彩，因為我個對手係好有演戲經驗嘅阿June，我同佢劇中飾演一對夫妻，所以演技上佢幫助我好多，而家排咗幾次，今日雖然打風冇得去現場綵排，但我都好好彩，有另外一個對手，可以無時無刻、風雨不改咁同我綵排對白同練歌，就係我兩個仔喇，佢哋都係其中嘅演出者。」
佢哋又話咁努力排練，係因為非常喜歡劇目主題講嘅「第一志願」，身為爸爸嘅Benson同Cris都指，今次演出唔止小朋友同父母啱睇，Cris話：「我唔係賣花讃花香，但呢個劇係真係好啱所有人睇，每個人睇完都肯定有得著。因為我哋成長過，我哋都做過小朋友，我相信每個人都有為自己嘅「第一志願」而煩惱過，所以睇呢個劇一定唔多唔少會有共鳴。」
