香港電視界再傳出令人痛惜消息，曾監製《誓不低頭》等多部名作嘅TVB前資深監製兼戲劇組製作部經理；人稱「材叔」嘅梁材遠，今日（26號）傳出離世消息。呢位曾為香港電視史締造無數收視神話同經典名作嘅大推手，告別人生舞台，終年75歲，曾合作《大醬園》嘅朱晨麗亦喺限時動態悼念。
梁材遠於1975年畢業於香港浸會學院歷史系碩士，同年加入無綫電視，由《歡樂今宵》見習編劇同資料搜集做起。期間曾短暫轉投麗的電視與佳藝電視，1978年重返TVB後參與《網中人》、《火玫瑰》等名劇的編導工作。
1985年，材叔正式升任監製，首部執導作品為青春劇《中四丁班》。而真正將他推上事業高峰的，係1988年與編劇韋家輝合作嘅重頭劇《誓不低頭》。劇集由鄭少秋、曾江主演，當時全港萬人空巷追劇，唔止創下超高收視，更成為1988年度全年最高收視劇集。
90年代材叔升任製作部經理後，策劃《情濃大地》、《茶是故鄉濃》、《酒是故鄉醇》等，同樣叫好叫座。
材叔亦係影帝鄭則仕同馬浚偉嘅「伯樂」與最佳拍檔，鄭則仕每次重返無綫接拍嘅劇集幾乎都由材叔一手操刀。
2020年1月，材叔正式宣布退休離開TVB，而由朱晨麗、何廣沛主演嘅賀歲劇《大醬園》則成為其電視生涯的告別作。退休後材叔作風相當低調，專心調養身體、陪伴家人，閒時與昔日幕後老友聚會茶敘，過着清靜自在的退休生活。重溫當年材叔詳解《大醬園》創作背景