香港動漫電玩節 近日舉行，今年大會亦舉辦「國際動漫大師 x 香港明星聯乘」企劃，邀請逾百位國際同本港著名動漫大師，與香港著名藝人交流互動，藝人各自與一位動漫巨匠，合作繪畫特選主題。而早前再開完個人展覽嘅 丁子朗 ，於現場與國際動漫大師成就一場史無前例嘅藝人與漫畫家之間對話。
丁子朗熱愛繪畫與陶藝創作，親臨動漫節「潮巨匠」現場嘅佢，就同心儀嘅韓國著名陶瓷藝術團隊TOiNZ交流合照。TOiNZ以丁丁早前個人畫展嘅作品為靈感，將團隊標誌性陶藝小人同丁丁嘅靚仔形象一併畫入作品中。
TOiNZ由四位才華洋溢嘅韓國陶藝家組成，擅長將傳統陶藝技術與玩具設計結合，創作出充滿療癒感嘅作品，同丁丁嘅藝術風格不謀而合。
丁丁收到畫作時非常驚喜，仲話：「身為一個平時都鍾意拎起畫筆嘅人，每一次睇到其他人筆下嘅自己，感覺都好奇妙。多謝TOiNZ幫我繪畫，筆觸有一種好原生、好治癒嘅力量。我認為藝術最正嘅地方，就係大家唔需要用好多言語，透過線條同色彩，就可以完成一場跨越語言嘅交流。Love this piece so much.」
