神隱多年嘅80年代傳奇組合Raidas主音 陳德彰 ，最近推出全新專輯《別人的歌》 ，除重新灌錄當年金曲《別人的歌》、《人海中我是誰》、《知得太多》 以外，更演繹達明一派嘅《石頭記》、梅艷芳嘅《似是故人來》同陳奕迅嘅《陀飛輪》等多首「別人的歌」，仲邀請新秀同屆戰友張衞健合唱 《舊朋友》，話題十足。
陳德彰早前接受影片頻道專訪，分享淡出幕前後一直從事幕後聲演同配唱製作，Thomas笑言：「做咗幾十年製作，經常捱通宵，混音交貨已經半夜。」
2023年推出《傾心延續》專輯，但當時並未參與任何宣傳，亦抗拒拍攝新相作封套，佢解釋話：「張唱片屬於試探性質，自己仍未準備好，現在既然繼續出碟，就出來見見大家啦。」 《別人的歌》大部份曲目由佢親自選曲，當中重點係Thomas同張衞健友情合唱嘅《舊朋友》，Thomas透露：「我經常都會遇到張衛健，就諗不如搵當年新秀一齊比賽嘅朋友合唱，名副其實係『舊朋友』喇啩？打電話邀約時Dicky話俾佢諗一諗，轉頭好快就答應可以試吓，當時佢做緊Big 4演唱會，我話等佢完成晒再講。」
Thomas先灌錄自己嘅部分，再陪Dicky入錄音室，而當年參賽時期嘅聚會相片，就可見Thomas同Dicky非常老友，Thomas亦非常懷念呢段美好時光：「每次重溫呢啲相，見到大家玩得非常投入，真係一段開心嘅回憶，好想趁今次機會分享一下，證明參加比賽唔一定要鬥個你死我活，一樣可以存在真正嘅友誼。」 Thomas 1984年參加《第三屆新秀歌唱大賽》選唱譚詠麟嘅《傲骨》，一路殺入決賽，佢仲話心中無太大寄望，反而早已鎖定金獎誰屬：「我心目中冠軍人選始終都係張衛健，我見佢經常秘密練舞，以前住美孚仲成日偶遇，大概知道佢家庭狀況，佢當時要養家好辛苦。」
Thomas本身亦係三甲的大熱，可惜出現突發情況影響正常發揮：「我從來冇公開講過，當晚現場比賽時，幾位舞蹈員可能驚我唔記得舞步，用力撳我、拉我、扯我，令我嚇一嚇，分散注意力，表現頂多只得7、8成，並非平時最佳水準！」
雖然無功而回，但賽後評判顧嘉煇坦言全場所有參賽者中，給予Thomas最高分數，Thomas語帶感恩話：「好似中獎一樣，被份量十足嘅音樂大師咁稱讚我已經足夠喇。」