無綫前資深監製兼戲劇組製作部經理、人稱「材叔」嘅梁材遠星期日驚傳離世噩耗，享年75歲。消息曝光後，多位曾同佢合作過嘅藝人都相繼發文哀悼，感嘆香港電視界失去了一位提攜後輩不遺餘力嘅伯樂。
梁材遠服務TVB逾36年，近年打造過多部膾炙人口嘅劇集。多年來一直樂於給予新人同轉型藝人機會，成為圈中不少藝人的恩師與伯樂。2015年重頭劇《張保仔》重用當時由主持轉戰演員嘅 洪永城 飾演男主角「張保仔」，同時給予姚子羚發揮空間飾演「炎貴妃」，兩人聲勢大增，姚子羚更一舉奪得「最佳女配角」。
子羚於社交平台分享當年劇本，仲寫道：「敬愛的材叔很感恩能參與您的作品，由《金石良緣》、《蒲松齡》、《情越雙白線》、《紫禁驚雷》、《造王者》、《情越海岸線》到《張保仔》，謝謝您給我很多的演出機會。」
「因為您，讓我在《張保仔》中炎貴妃的角色，拿下我人生重要的獎項，我會惦記着您那和藹可親的笑容，惦記着每次告訴我每個角色的內容，惦記着我經過的時候您向我問好，願您離苦得樂，往生凈土，永遠懷念您🙏🏻🕯️🫶🏻」
而洪永城亦回憶當時嘅拍攝點滴話：「多謝材叔咁多年前俾嘅機會，你同你嘅名一樣咁親切、平易近人、你亦都用心提攜後輩，感激你為香港影視業貢獻半個世紀。多謝你，一路好走。仲記得連續兩年同你一齊慶祝生日。」
「三太」樊亦敏亦曾參與唔少材叔嘅作品，佢貼出昔日合照寫道：「🙏材叔 🙏感恩 🙏感謝 🙏懷念 🙏謝謝您 🙏謝謝你曾給予我的工作機會（《街坊財爺》、《 火線下的江湖大佬》、《 果欄中的江湖大嫂》、《 大醬園》 ）和提攜，十分懷念您這位慈祥、上善若水的長輩 。那天很晚，為了第二天拍攝的事情，我們在電話中談了差不多兩小時的情景還歷歷在目⋯⋯你是一個攝影愛好者，說過要看你拍攝的照片…………昨天您走了，願您生於蓮花🪷之上🙏一路好走🙏 我會繼續努力，好好珍惜一切🙏」
至於衛志豪亦公開過往合照，佢指：「能夠認識你，是我的幸運，我入咗TVB之後，你每一套都預我一個角色！我不知那來的福氣！多謝你材叔，你令我覺得我係一個演員. 材叔－路好走🙏RIP」
