曾參加《中年好聲音3》嘅註冊土木工程師 任永健 ，近日推出首支自己作曲填詞嘅原創單曲《鋼鐵爸爸》，呢首新歌嘅背後更承載咗佢走過癌症生死關頭、兩代父子之間嘅強大基因，以及對人生「愛與陪伴」嘅終極反思。
永健自小深受身為建築工人嘅爸爸影響，對建築與橋樑情有獨鍾，但同時佢亦有一個歌手夢，喺大學畢業後更曾為劉德華嘅演唱會擔任Dancer。不過好景不常，永健喺畢業後赫然發現自己患上鼻咽癌第三期，而且癌細胞已開始擴散，當時只有廿幾歲嘅佢，因為高強度嘅電療與化療，令佢完全無法進食、亦無法躺下入睡，雖然最後成功抗癌，但嚴重嘅副作用令佢嘅脖子嚴重燒傷，喉嚨受損，往後幾年基本上完全唱唔到歌，當時永健以為自己再同歌手無緣。直至十幾年後，永健為咗向囝囝證明「努力堅持唔放棄」，於是報名參加《中年好聲音3》，最終得到第14名。
「男人四十而不惑」，喺永健40歲嗰年睇到一句「有心唔怕遲」嘅勵志語錄，令佢毅然決定重拾樂理、並開始學習鋼琴。經過兩年打好創作根底，永健終於創作出《鋼鐵爸爸》。作為初次啼聲嘅唱作人，永健獲得林德寶老師喺作曲上嘅專業指導，又獲著名編劇兼導演李敏喺作詞上畀咗唔少寶貴意見。而喺《中聲》中結識嘅好友陳俞霏，更喺編曲上幫咗佢唔少。
講到《鋼鐵爸爸》嘅 MV，永健採用高成本的嘅「平行時空」微電影手法拍攝，MV喺廢鐵場中取景，佢仲為呢個MV特製咗一套耀眼嘅黃金鋼鐵人盔甲，實行將自己腦海中嘅「鋼鐵爸爸」實體化：「MV中嗰套金屬感十足的黃金鋼鐵人盔甲，是我親自參與設計並自資訂造的！它的心口和手臂是真的會發光，非常厲害。現在這套盔甲就擺在我們家客廳，兩個兒子簡直把它當『神』一樣拜，天天圍著它轉！」
但由於為機械人身高超過兩米，所以拍攝時永健必須踩住高蹺走動，如果一個不慎跌倒就會跌落廢鐵坑，加上拍攝現場氣溫高達三十幾度，所以佢話當時自己同攝影師都幾乎中暑。而拍攝MV當日仲有一件烏龍事發生，就係大家完成拍攝離開廢鐵場後，攝影師先發現自己嘅私家喇叭留咗喺現場，但當佢哋折返現場，喇叭已經冇咗，不過攝影師就非常豁達，仲話呢次拍攝嘅價值早已超過喇叭嘅價值。
